Makamu wa Pili wa Rais wa Zanzibar Balozi Seif Ali Iddi akikagua Maabara ya Bodi ya Chakula, Dawa na Vipodozi iliopo Mtaa wa Mombasa nje kidogo ya Mji wa Zanzibar.

Makamu wa Pili wa Rais wa Zanzibar Balozi Seif Ali Iddi akiwa na mwenyeji wake Mrajisi wa Bodi ya Chakula, Dawa na Vipodozi Dr. Burhan Othman Simai akikagua Maabara ya Bodi hiyo iliyopo kwenye jengo lao jipya   liliopo Mtaa wa Mombasa nje kidogo ya Mji wa Zanzibar.  Picha na Hassan Issa wa – OMPR – ZNZ.

 Mratibu wa mradi wa EAC – MRH ulio chini ya Bodi ya Chakula na Dawa Zanzibar Bibi Hidaya Juma akitoa maelezo ya maendeleo ya mradi huo mbele ya Balozi Seif aliyefika katika  Jengo la Bodi hiyo kulikagua. Picha na Hassan Issa wa – OMPR – ZNZ.

Mrajisi wa Bodi ya Chakula, Dawa na Vipodozi Dr. Burhan Othman Simai akimpatia maelezo Balozi Seif juu ya juhudi wanazochukuwa watendaji wa Bodi hiyo kukagua bidhaa mbali mbali zinazoingizwa nchini ili kujua ubora wake.
Picha na Hassan Issa wa – OMPR – ZNZ.

Meneja wa Kitengo chaMtandao wa mawasiliano ya Kompyuta  cha Bodi ya Chakula na Dawa { ZFDB } Ndugu Mohamed Yahya Said aliyevaa shati rangi ya buluu akielezea mfumo wa Mradi wa MRH unaotoa fursa kwa Bodi ya Chakula na Dawa kuwa na mawasiliano ya moja kwa moja ya mamlaka za Bodi nyengine Duniani.

Press Release:-

Makamu wa Pili wa Rais wa Zanzibar Balozi Seif Ali Iddi ameuomba Uongozi wa Bodi ya Chakula,Dawa na Vipodozi Zanzibar { ZFDB } kuwaelimisha wananchi  juu ya mfumo bora wa matumizi ya vyakula na vinywaji ili kulinda afya zao.

Alisema afya za jamii zitaendelea kuimarika na kuwa salama endapo vyakula na vinywaji wanavyotumia vinakuwa salama katika kiwango kinachokubalika  kwa matumizi ya mwanaadamu popote pale Duniani.

Balozi Seif alitoa ombi hilo wakati alipofanya ziara fupi  ya kulikagua jengo jipya la Bodi ya Chakula, Dawa na Vipodozi  Zanzibar liliopo katika Mtaa wa Mombasa  Wilaya ya Magharibi nje kidogo ya Mji wa Zanzibar.

Alisema hatua ya kuuelimisha umma kupitia vyombo mbali mbali vya Habari na mawasiliano inafaa iongezwe kwa lengo la kuitanabaisha jamii kujiepuka  na hila za baadhi ya wafanyabiashara wanaotumia mwanya wa kusambaza bidhaa zisizostahiki kutumiwa na mlaji.

Alieleza kwamba zipo bidhaa zinazoingizwa nchini na baadhi ya wafanyabiashara ambazo tayari zimeshapitwa na wakati wa matumizi wakijua fika kwamba zinaweza kuleta athari kwa umma lakini kinachowapa msukumo wa kufanya hivyo ni tamaa na utajiri wa haraka haraka.

Makamu wa Pili wa Rais wa Zanzibar aliushukuru Uongozi na wafanyakazi wa Bodi hiyo ya Chakula, Dawa na Vipodozi kwa kujudi wanazochukuwa za kukabiliana na wajanja wanaojaribu kuingiza bidhaa zisizostahiki kutumika hapa nchini bila ya kujali afya za wananchi wenzao.

Balozi Seif pia akaupongeza uongozi wa Bodi hiyo kwa hatua iliyofikia ya kujenga jengo kubwa na la kisasa linalokwenda na wakati na kuuhakikishia Uongozi wa Bodi hiyo kwamba atachukuwa juhudi katika kuona yale mafungu yao wanayopangiwa katika Bajeti ya Wizara yao wanayapata ili kukamilisha ujenzi wao.

Mapema Mrajisi wa Bodi ya Chakula, Dawa na Vipodozi Zanzibar Dr. Burhan Othman Simai alisema Bodi hiyo hivi sasa imejikita zaidi katika kuongeza uwezo wa kulinda afya za Wananachi kwa kutumia mfumo wa Taaluma.

Dr. Burhan alisema watendaji wa bodi hiyo watajengewa mazingira mazuri ya kupatiwa mafunzo ya kitaalamu zaidi ambayo  yatakidhi mahitaji halisi ya mfumo huo.

Mrajisi huyo wa Bodi ya Chakula, Dawa na Vipodozi alifahamisha kwamba  Taasisi hiyo kwa mujibu wa vigezo na taratibu za Kimataifa kwa  sasa inalazimika kuwa Mamlaka inayojitegemea.

Alisema licha ya juhudi za kwenda na vigezo hivyo iliyochukuliwa na Bodi hiyo kwa hatua ya kuandaa rasimu ya mabadiliko ya sheria iliyoandaliwa na  Taasisi hiyo lakini ufinyu wa bajeti nao unachangia kuzorota kwa suala hilo.