Makamu wa Pili wa Rais wa Zanzibar Balozi Seif Ali Iddi akisema wakati wa hafla maalum ya chakula cha usiku alichowaandalia watendaji wa Taasisi zilizo chini ya Ofisi yake kufuatia kukamilisha na hatimae kupita kwa Bajeti ya Wizara.

Kikundi cha Muziki wa Morden Taarab cha Big Staa chenye mastakimu yake Ofisi ya Mkoa Mjini Amani kikitoa burdani kwenye tafrija ya kuwapongeza Viongozi na watendaji wa Taasisi zilizochini ya Ofisi ya Makamu wa Pili wa Rais wa Zanzibar baada ya kupita kwa Bajeti ya Wizara hiyo pamoja na kuagana kwa kukaribia kukamilika kwa kipindi cha miaka mitano. Picha Hassan Issa – OMPR – ZNZ.

Makamu wa Pili wa Rais wa Zanzibar  Balozi Seif Ali Iddi  aliyepo mwanzo kushoto akiwa na Mwenyekiti wa Kamati ya Kudumu ya Baraza la Wawakilishi inayosimamia Ofisi za Viongozi Wakuu wa Serikali Kushoto yake Mh. Hamza Hassan Juma na Mjumbe wa Kamati hiyo Mh. Makame  Mshimba Mabrouk  kwenye tafrija ya kuwapongeza watendaji wa Ofisi ya Makamu wa Pili wa Rais wa Zanzibar.  Picha Hassan Issa – OMPR – ZNZ.

Balozi Seif wa pili kutoka kushoto akijumuika pamoja na Viongozi na watendaji wa Ofisi yake kwenye tafrija aliyowaandalia baada ya kupita kwa Bajeti ya Wizara hiyo katika Kikao cha Baraza la Wawakilishi kinachoendelea. Kushoto ya Balozi Seif ni Waziri wa Nchi Ofisi ya Makamu wa Pili wa Rais wa Zanzibar Mh. Mohammed Aboud Mohammed, Mjumbe wa Kamati ya Kudumu ya Baraza la Wawakilishi inayosimamia Ofisi za Viongozi Mh. Ali Mzee Ali, Mwenyekiti wa Kamati hiyo Mh. Hamza Hassan Juma, Mh. Makame Mshimba Mbarouk pamoja na Makamu Mwenyekiti wa Kamati hiyo Mh. Saleh Nassor Juma. Picha Hassan Issa – OMPR – ZNZ.

Baadhi ya Watendaji wa Taasisi zilizochini ya Ofisi ya Makamu wa Pili wa Rais wa Zanzibar wakijipatia mlo kwenye tafrija hiyo iliyofanyika katika Makazi ya Balozi Seif yaliyopo Mazizini nje kidogo ya Mji wa Zanzibar. Picha Hassan Issa – OMPR – ZNZ.

Waziri wa Nchi Ofisi ya Makamu wa Pili wa Rais wa Zanzibar Mh. Mohammed Aboud Mohammed akizungumza kabla ya kumkaribisha Makamu wa Pili wa Rais wa Zanzibar Balozi Seif kuzungumza na Viongozi na watendaji wa Ofisi yake. Picha Hassan Issa – OMPR – ZNZ.

Balozi Seif akitoa nasaha zake mara baada ya kuwaandalia chakula cha usiku Viongozi na Watenmdaji wa Taasisi zilizochini ya Ofisi yake kufuatia kupitishwa kwa Bajeti ya Wizara hiyo pamoja na kuagana baada ya kufanyakazi pamoja katika kipindi cya miaka mitano iliyopita. Picha Hassan Issa – OMPR – ZNZ.

Balozi Seif kati kati akiwa pamoja na wake zake Mama Pili Seif Iddi na Mama Asha Suleiman Iddi wakijumuika pamoja katika kusakata rumba kwenye tafrija ya kuwapongeza watendaji wa Ofisi yake hapo Nyumbani kwake Mazizini nje kidogo ya Mji wa Zanzibar. Picha Hassan Issa – OMPR – ZNZ.

 Press Release:-

Makamu wa Pili wa Rais wa Zanzibar Balozi Seif Ali Iddi alisema Watendaji wa Taasisi za Serikali wana wajibu wa kutumia vipaji walivyojaaliwa kuwa navyo katika kubuni mbinu na mikakati watakayohisi kwamba inaweza kutaleta faida na ufanisi katika maeneo yao ya kazi sambamba na Serikali  Kuu kwa jumla.

Alisema faida ya ubunifu watakaoutumia watendaji hao utaongeza kasi ya uwajibikaji endapo wataendelea kushikamana baina yao katika kufanya kazi kwa juhudi, maarifa na nidhamu kwa kutumia vipaji hivyo.

Balozi Seif Ali Iddi alisema hayo wakati wa hafla maalum ya chakula cha usiku alichowaandalia watendaji wa Taasisi zilizo chini ya Ofisi yake kufuatia kukamilisha  na hatimae kupita kwa Bajeti ya Wizara hiyo pamoja na kuagana baada ya kufanya kazi pamoja katika kipindi chote cha miaka mitano tokea mwaka 2010.

Hafla hiyo ya chakula cha usiku iliyofanyika katika Makaazi ya Balozi Seif Mazizini Nje kidogo ya Mji wa Zanzibar ilijumuisha pia baadhi ya wajumbe wa Kamati ya Kudumu ya Baraza la Wawakilishi inayosimamia Ofisi za Viongozi wakuu wa Serikali, wafanyakazi wa Baraza hilo wakiwemo wawakilishi wa taasisi tofauti za ndani na nje ya nchi wanaofanya kazi pamoja na watendaji wa Ofisi ya Makamu wa Pili wa Rais wa Zanzibar.

Balozi Seif aliwapongeza watendaji wa taasisi zote zilizo chini ya Ofisi yake kwa kufanya kazi nzuri katika utekelezaji wa majukumu yao likiwemo pia suala  la kutengeneza Bajeti na hatimae kupita bila ya vikwazo katika Kikao cha Bajeti cha Baraza la Wawakilishi kinachoendelea.

Alisema hatua hiyo imempa moyo na faraja kubwa iliyosababisha ndani ya kipindi cha miaka mitano cha uwepo wake katika Wizara hiyo kutokwaruzana au kumgomba Mfanyakazi ye yote kwa vile kila mmoja likuwa akijuwa wajibu wake.

“ Miaka mitano ya uwepo wangu ndani ya Ofisi hii sijawahi kumgomba Mfanyakazi hata mmoja ukiachia zile kasoro ndogo ndogo za kibinaadamu zisizoepukika. Hii inatokana na kila mtendaji kuelewa wajibu wake ipasavyo “. Alisema Balozi Seif.

Makamu wa Pili wa Rais wa Zanzibar ambae ndie Mtendaji Mkuu wa Serikali ya Mapinduzi ya Zanzibar aliwaasa Viongozi wa Taasisi hizo pamoja na nyengine  za umma kuwa na tahadhari wakati wanaposimamia haki za watendaji wao na kuepuka fitna na majungu ambazo hatimae huzaa chuki kati yao na watendaji hao.

Balozi Seif alisema wapo baadhi ya viongozi wanaokumbwa na kashfa na matatizo kutokana na vitendo wanavyowafanyia  watendaji  wa ngazi ya chini ambapo hutoa mwanya kwa  wafanyakazi wanaowaongoza  kufurahia wakati wanapohamishwa au kustaafu kazi.

“ Tumekuwa tukishuhudia mara kwa mara mikasa inayowakumba baadhi ya Viongozi wa Taasisi ambapo watendaji wao hufikia maamuzi ya kupika pilau au biriani wanapopata taarifa kwamba Bosi wao kastaafu au kuhamishwa na kupelekwa katika sehemu nyengine ya kazi “.Alitahadharisha Balozi Seif.

Aliuwakumbusha Viongozi hao kwa kushirikiana na watendaji wao kuendelea kupendana ili inapotokea kukutana tena baada ya kumaliza utumishi wao wakumbatiane kwa kuonyeshana upendo wao wa dhati.

Mapema Katibu Mkuu Ofisi ya Makamu wa Pili wa Rais wa Zanzibar Dr. Khalid Salum Mohammed kwa niaba ya Watendaji wa Taasisi zilizo chini ya Ofisi hiyo amemshukuru na kumpongeza Makamu wa Pili wa Rais wa Zanzibar Balozi Seif Ali Iddi kwa kuwaongoza vyema watendaji hao katika utekelezaji wa majukumu yao.

Dr. Khalid alisema Uongozi  huo wa busara wa Balozi Seif Ali Iddi umesaidia kuleta ufanisi na kuiwezesha Ofisi hiyo inayoratibu shughuli  nzima za Serikali kufikia malengo iliyojipangia ya zaidi ya asilimia 90% katika kipindi cha miaka mitano iliyopita.

Alifahamisha kwamba Watendaji wa Taasisi zote zinazofanyakazi chini  ya Ofisi hiyo wamefarajika na utendaji wa Kiongozi huyo pamoja na wale waliochini yake ulioonyesha upendo na mshikamano miongoni mwa wafanyakazi wote.

Dr. Khalid alisema mshikamano huo wa pamoja kati ya viongozi na watendaji hao ndiyo chachu ya mafanikio yaliopelekea kuibua wafanyakazi bora wapatao 11 ndani ya Taasisi zilizo chini ya Ofisi hiyo jambo ambalo linastahiki kupongezwa na kuigwa na Taasisi nyengine za Umma hapa Nchini.

Naye Mwenyekiti wa Kamati ya kudumu ya Baraza la Wawakilishi Zanzibar inayosimamia Ofisi za Viongozi Wakuu wa Serikali Mh. Hamza Hassan Juma alisema Utamaduni  wa kupongezana ulioanzishwa na Ofisi ya Makamu wa Pili wa Rais wa Zanzibar baada ya kazi ngumu wanazozifanya unafaa kuigwa na Taasisi nyengine hasa wakati watendaji wanapopata mafanikio makubwa.

Mh. Hamza alisema uratibu makini  uliokuwa ukisimmamiwa na watendaji wa Taasisi zilizo chini ya Ofisi ya Makamu wa Pili wa Rais wa Zanzibar umesaidia kuleta mafanikio makubwa katika utendaji mzima wa Serikali.

Mwenyekiti huyo wa Kamati ya Kudumu ya Baraza la Wawakilishi inayosimamia Ofisi za Viongozi Wakuu wa Serikali ameipongeza Idara ya Maafa Zanzibar chini ya Mkurugenzi wake kwa juhudi zake za kutoa elimu kwa Umma iliyosaidia kupunguza majanga ya maafa wakati wa  mvua za masika zilizopita hivi karibuni.

Akimkaribisha Balozi  Balozi Seif kuzungumza na hadhara hiyo Waziri wa Nchi Ofisi ya Makamu wa Pili wa Rais wa Zanzibar Mh. Mohammed Aboud Mohammed amewashukuru na kuwapongeza Wajumbe wa Kamati  ya Kudumu ya Baraza la Wawakilishi inayosimamia Ofisi za Viongozi Wakuu wa Serikali kwa kusimamia vyema na uadilifu utendaji Mzima wa Ofisi ya Makamu wa Pili wa Rais wa Zanzibar.

Waziri Aboud alisema usimamizi wa Kamti hiyo umeiwezesha Ofisi hiyo kuratibu vyema Ilani ya Uchaguzi ya CCM ya mwaka 2010 kwa zaidi ya asilimia 95% chini ya rasilmali iliyopo ya Taifa ya amani na utulivu inaoendelea kupatikana kutokana na umoja na mshikamano miongoni mwa Wananchi wote.

Read More

Rais wa Zanzibar na Mwenyekiti wa Baraza la Mapinduzi Dr. Ali Mohammed Shein alisema Mabalozi wanayoiwakilisha Tanzania katika Mataifa tofauti Duniani wanapaswa kuitekeleza vilivyo Sera ya Mambo ya Nje.

Makamu wa Pili wa Rais wa Zanzibar Balozi Seif anayetembea kati kati ya zulia jekundu akisindikizwa na Waziri wa Mambo ya Nje na Ushirikiano wa Kimataifa Mh. Bernard Membe kulia yake na Naibu waziri wa Wizara hiyo Mh. Mahadhi Juma kushoto yake wakiingia ndani ya Hoteli ya Ramada Dar es salaam kwenye ufungaji wa Mkutano wa  Nne wa Mabalozi wa Tanzania nchi mbali mbali Duniani.  Picha Hassan Issa – OMPR – ZNZ.

 Balozi Seif kwa Niaba ya Rais wa Zanzibar na Mwenyejkiti wa Baraza la Mapinduzi Dr. Ali Mohammed Shein akiufunga Mkutano wa Nne wa siku Tatu wa Mabalozi wa Tanzania uliokuwa ukifanyika katika Hoteli ya Ramada Mjini Dar es salaam.  Picha Hassan Issa – OMPR – ZNZ.
Baadhi ya Mabalozi wa Tanzania katika Mataifa mbali mbali Duniani walioshiriki Mkutano wao wakifuatilia Hotuba ya Ufungaji wa Mkutano huo iliyosomwa na Balozi Seif kwa niaba ya Rais wa Zanzibar Dr. ASli Mohammed Shein.  Picha Hassan Issa – OMPR – ZNZ.

Balozi Seif akiwa katika picha ya pamoja na Mabalozi wa Tanzania Nchi mbali mbakli Duniani mara baada ya kuufunga Mkutano wao wa Nne hapo Ramada Hoteli Jijini Dar es salaam.
Kulia ya Balozi Seif ni Waziri wa Mambo ya Nje wa Tanzania Mh. Benar Membe, Katibu Mkuu Mpya wa Wizara hiyo Balozi Lebereta Mula mula na kushoto ya Balozi Seif ni Naibu Waziri wa Wizara hiyo Mh. Mhadhi Juma Maalim. Picha Hassan Issa – OMPR – ZNZ.

Makamu wa Pili wa Rais wa Zanzibar Balozi Seif akisalimiana na Balozi wa Tanzania Nchini Jamuhuri ya Watu wa China Balozi Abrahaman Nyimbo mara baada ya kumalizika kwa Mkutano wa Mabalozi wa Tanzania Mjini Dar es salaam. Picha Hassan Issa – OMPR – ZNZ.


Press Release:-
Rais wa Zanzibar na Mwenyekiti wa Baraza la Mapinduzi Dr. Ali Mohammed Shein alisema Mabalozi wanayoiwakilisha  Tanzania katika Mataifa tofauti Duniani wanapaswa kuitekeleza vilivyo Sera ya Mambo ya Nje inayolenga katika Diplomasia ya uchumi ambayo ndiyo muongozo wao katika utekelezaji wa jukumu lao la msingi.
Alisema Sera hiyo ni vyema ikatumika vizuri wakati huu ambao Taifa la Tanzania linatekeleza Dira ya kuelekea uchumi wa Kati na kati ifikapo mwaka 2020 kwa upande wa Zanzibar na Mwaka 2025 kwa Tanzania Bara.
Dr. Ali Mohammed Shein alisema hayo wakati akiufunga Mkutano wa Nne wa siku Tatu  wa Mabalozi wa Jamuhuri ya Muungano wa Tanzania katika Hotuba iliyosomwa kwa niaba yake na Makamu wa Pili wa Rais wa Zanzibar Balozi Seif Ali Iddi hapo katika Ukumbi wa Hoteli ya Ramada Jijini Dar es salaam.
Alisema katika kipindi cha zaidi ya miaka kumi ya utekelezaji wa Sera ya Mambo ya Nje yenye kuweka msisitizo katika Diplomasia ya Uchumi Tanzania imepiga hatua kubwa vikiwemo  Visiwa vya Zanzibar.
Dr. Shein alifahamisha kwamba matunda ya Sera hii yanadhihirisha wazi ukuaji wa sekta ya Utalii, miradi mengine ya kiuchumi ikiwemo pia ile mikubwa inayotekelezwa na wahisani kwa upande wa Zanzibar.
“ Mikakati mipya ya muda mfupi na mrefu mliowekeana katika Mkutano huu ni msingi mzuri kabisa kufuatana na mabadiliko ya uchumi yanayotokea Duniani na kufikia malengo ya Dira ya 2020 na 2025 “. Alisema Dr. Shein.
“ Nina hakika kuwa katika Mkutano huu mmeweza kuziba nyufa zote zilizojitokeza katika utekelezaji wa Sera ya Mambo ya Nje ya Mwaka 2001 inayolenga katika Diplomasia ya Uchumi ambayo ndio muongozo wetu katika utekelezaji wake na ni jukumu letu la msingi “. Alisisitiza Dr. Shein.
Rais wa Zanzibar alieleza kwamba licha ya mafanikio makubwa ya kiuchumi na maendeleo yanayoendelea kushuhudiwa kwa upande wa Zanzibar lakini bado iko haja kwa Mabalozi hao wa Tanzania kuongeza juhudi za kuitangaza Zanzibar  katika Mataifa waliyopangiwa kutekeleza majukumu yao ya Kidiplomasia.
Alisema mafanikio ya Zanzibar katika kukuza sekta ya Utalii , uwekezaji na utekelezaji wa mipango mengine ya maendeleo hutegemea sana juhudi za Ofisi za Kibalozi katika kuitangaza Zanzibar nchi za Nje.
Dr. Shein alifahamisha kwamba baadhi ya wakati Serikali imekuwa ikipokea malalamiko kutoka kwa wawekezaji, watalii na wageni wanaofika Zanzibar juu ya ukosefu wa taarifa za kutosha kuhusu Zanzibar katika Ofisi za Kibalozi za Tanzania.
Aliwakumbusha Mabalozi hao kwamba katika kutekeleza majukumu yao ni vyema kila wakati wakazingatia kuwa Ofisi zao zinaweka taarifa za kutosha juu ya sekta zote muhimu za kiuchumi na kijamii za pande zote mbili za Jamuhuri hasa zile fursa za uwekezaji vivutio vya utalii.
“ Suala hili nimekuwa nikilikumbusha kila ninapopata fursa ya kuzungumza nanyi, hasa wakatia mbao Mabalozi huja kunitembelea na kuniaga kabla ya kuripoti katika vituo vyao vya kazi “. Alifafanua Dr. Shein.
Alifahamisha kwamba Serikali ya Mapinduzi ya Zanzibar iko tayari kupokea mawazo ya Mabalozi hao ili kupata fursa nzuri ya nini Wanadipomasia hao wakitangaze kuhusu Zanzibar.
Rais wa Zanzibar alihimiza kwamba katika kipindi hichi ambapo Nchi mbali mbali Duniani zimekumbwa na misukosuko ya kutetereka kwa hali ya amani na utulivu Mbalozi hao wanapaswa kuzitangaza fursa ya kiuchumi zilizopo Nchini na kuzihusisha na hali ya amani na utulivu uliopo Nchini Tanzania.
Alieleza kuwa amani na utulivu ni miongoni mwa vigezo muhimu vya awali vinavyozingatiwa na wawekezaji pamoja na wageni wanaotaka  kwenda nje ya nchi zao kwa nia ya kuwekeza na kufanya biashara.
Rais wa Zanzibar na Mwenyekiti wa Baraza la Mapinduzi Dr Ali Moh’d Shein amezipongeza juhudi kubwa zinazoendelea kuchukuliwa na Ofisi za Kibalozi za Tanzania kwa kufanya kazi kwa karibu na Wizara ya Nchi, Ofisi ya Rais, Ikulu na Utawala Bora Zanzibar katika masuala yanayohusu Diaspora.
Alisema Wananchi wameshuhudia mafanikio makubwa yaliyopatikana katika kipindi kifupi tokea kuanzishwa kwa Idara inayohusika na Diaspora ambapo imeweza kushajiisha ushiriki wa Wanadiaspora katika utekelezaji wa mipango ya Maendeleo hasa katika sekta ya Elimu, Afya, Utalii na Uwekezaji.
Dr. Shein alionyesha faraja yake kutokana na Washiriki wa Mkutano huo wa Nne wa Mabalozi wa Tanzania kujadili matarajio ya Diaspora kwa Serikali na Balozi hizo kuelekea Dira ya Taifa ya Maendeleo.
Alisema Mada hiyo imekuja wakati muwafaka ambapo Serikali zote mbili zimekuwa zikitunga sera na sheria mbali mbali zenye malengo ya kuimarisha ushiriki wa Wanadiaspora katiika harakati za maendeleo na masuala mengine ya kiuchumi pamoja na kijamii.
Mkutano huo wa Nne wa Mabalozi wa Tanzania uliofunguliwa na Rais wa Jamuhuri ya Muungano wa Tanzania Dr. Jakaya Mrisho Kikwete umejadili mada tofauti ikiwemo Mwenendo wa Uchumi wa Tanzania, Mwelekeo wa utekelezaji wa Dira ya Taifa ya Maendeleo pamoja na Utangamano wa Kikanda na fursa zilizopo kwa Tanzania.
Mapema Waziri wa Mambo ya Nje na Ushirikiano wa Kimataifa wa Tanzania Mh. Bernard Membe alisema utekelezaji wa sera ya mambo ya nje inayolenga katika Diplomasia ya Uchumi umeleta faida kubwa katika uchumi wa Taifa ndani ya kipindi cha miaka kumi iliyopita.
Waziri Membe alisema ipo miradi kadhaa ya kiuchumi iliyotokana na sera hiyo kufuatiwa kutanganzwa na Ofisi za Kibalozi za Tanzania akiitaja kuwa ni pamoja na misaada ya maendeleo iliyofadhiliwa na mpango wa Milenia wa Marekani MCC na mradi wa chuma wa Mchuchuma.
Mh. Membe alisisitiza pia kuwa ipo miradi ya ujenzi wa Bandari ya Bagamoyo, Tanzania kusamehewa mikopo tofauti kutoka kwa baadhi ya wafadhii, mradi wa huduma za maji safi unafadhiiwa na Serikali ya Japan pamoja na mradi wa Kilimo kwa upande wa Visiwa vya Zanzibar.
Alisisitiza kwamba Serikali ya Jamuhuri ya Muungano wa Tanzania kupitia Wizara ya Mambo ya nje itahakikisha kwamba inaendelea kuchangia vikosi vya kulinda amani Barani Afrika.
Akitoa shukrani kwa niaba ya washiriki wa Mkutano huo wa Nne wa Mabalozi wa Tanzania Nchi Mbali mbali Duniani  Dini wa Mabalozi hao Balozi Kijazi alisema Maalozi hao wakirudi vituoni mwao watakuwa na kazi moja tu ya kutekeleza yale waliyoyajadili na kukuibaliana katika Mkutano huo.
Balozi Kijazi alilihakikishia Taifa kwamba Mabalozi hao wana nia safi ya kutekeleza majukumu yao kwa ufasini uliotukuka, lakini lakuzingatia zaidi ni uwezeshwaji wao ili kutekeleza vyema kazi yao hiyo ya Kidiplomasia.

Read More

Makamu wa Pili wa Rais wa Zanzibar Balozi Seif Ali Iddi akiufunga Mkutano wa Nne wa siku Tatu wa Mabalozi wa Tanzania

Makamu wa Pili wa Rais wa Zanzibar Balozi Seif Ali Iddi akiufunga Mkutano wa Nne wa siku Tatu wa Mabalozi wa Tanzania kwa niaba ya Rais wa Zanzibar na Mwenyejkiti wa Baraza la Mapinduzi Dr. Ali Mohammed Shein  uliokuwa ukifanyika katika Hoteli ya Ramada Mjini Dar es salaam.  Picha Hassan Issa – OMPR – ZNZ.

 Press Release:-

Makamu wa Pili wa Rais wa Zanzibar Balozi Seif Ali Iddi amewaasa wana Habari kutumia  vyema kalamu zao sambamba na kuzingatia maadili ya jukumu lao la kazi na kuepuka utashi unaoweza kuleta sintafahamu ambayo inaweza kuibua malumbano  na hatimae chuki kati yao na Viongozi.

Balozi Seif ametoa nasaha hizo kufuatia Taarifa ya Gazeti moja Nchini lililochapisha Taarifa yenye  kichwa cha Habari “ Makamu wa Rais Zanzibar amuunga mkono Membe “ wakati aliufunga Mkutano wa Nne wa Mabalozi wa Tanzania Nchi mbali mbali Duniani uliokuwa ukifanyika katika Hoteli ya Ramada Jijini Dar es salaam.

Balozi Seif akionyesha mshangao na kusikitishwa kwake  kutokana na Taarifa hiyo alisema alichokitamka wakati akikaribishwa na Waziri Membe kuufungua Mkutano huo ni kumtakia safari njema Waziri huyo ambayo ni ngumu.

Alisema alichowajibika na ndicho alichokifanya kwenye Mkutano huo ni kumuwakilisha Rais wa Zanzibar na Mwenyekiti wa Baraza la Mapinduzi Dr. Ali Mohammed Shein kuufungua Mkutano huo wa Babalozi na si kuzungumzia siasa ambapo sio mahala pake.

Balozi Seif alifafanua kwamba utashi wa kuandikwa kwamba anamuunga Mkono Waziri Membe una lengo la kutaka kumvuruga kisiasa kutokana na wadhifa wake akiwa Mmoja wa Viongozi wa Juu wa Serikali hapa Nchini.

“ Mimi kazi niliyokwendea  pale ni kumuakilisha Bosi wangu Rais wa Zanzibar kuufunga mkutano ule kwa niaba yake. Sasa hili la kusema nitamuunga mkono Waziri membe bega kwa bega nimelitoa wapi  na saa ngapi ?  Nilimwambia namtakia safari njema lakini nikamuasa aelewe kwamba ni safari ngumu ” .  Alifafanua Balozi Seif.

Alisema wajibu  na maadili ya  Viongozi wakuu  ni Kumuunga mkono   Mgombea ambaye tayari ameshachaguliwa katika ngazi ya juu ya Chama kwa ajili ya kuingia katika kinyang’anyiro cha Uchaguzi Mkuu.

Balozi Seif alieleza kuwa hatua hiyo imewekwa ili kuwepusha shari na mgawanyiko baina ya viongozi hao jambo ambao linaweza kusababisha mtafaruku endapo  Viongozi hao wataamua kujiingiza katika makundi na ndivyo anavyoamini yeye katika muda wake wote.

Makamu wa Pili wa Rais wa Zanzibar aliviomba vyombo vya Habari hasa Wahariri wa Vyombo hivyo kuhakikisha kwamba wataendelea kubeba dhima katika kuwapasha Habari Wananchi endapo watakuwa wakitoa Taarifa zenye muelekeo wa kusababisha vurugu na mgawanyiko baina ya Jamii.

Alisema zipo Nchi zilizoshuhudiwa kuingia katika migogoro ya Kisiasa na Kijamii na hatimae kusababisha maafa na Nakama kutokana na Kalamu wa Waandishi zilivyokuwa zikichochea shari na balaa.

Read More

Makamu wa Pili wa Rais wa Zanzibar Balozi Seif Ali Iddi akikagua harakati za ujenzi wa Jengo jipya la Abiria wa usafiri wa Anga katika uwanja wa ndege wa Kimataifa wa Abeid Amani Karume ulipo Kiembe Samaki Nje kidogo ya Mji wa Zanzibar .

Makamu wa Pili wa Rais wa Zanzibar Balozi Seif Ali Iddi wa Tatu kutoka kushoto akikagua maendeleo ya ujenzi wa jengo la Abiria { Terminal 11 } katika uwanja wa ndege wa Kimataifa wa Zanzibar wa Abeid Amani Karume akiwa pamoja na uongozi wa Wizara ya Miundombinu na Mawasiliano  Zanzibar. Picha na Hassan Issa  OMPR – ZNZ.

Msimamizi wa ujenzi wa jengo la Abiria katika uwanja wa ndege wa Zanzibar  upande wa Serikali ya Mapinduzi ya Zanzibar kupitia Wizara ya Miundombinu na Mawasiliano Zanzibar Nd. Yassir De Costa akimpatiamaelezo Balozi Seif hatua iliyofikiwa ya ujenzi wa mradi huo. Picha na Hassan Issa  OMPR – ZNZ.

Mshauri wa mradi wa ujenzi wa jengo la abiria { Terminal 11 } kutoka Kampuni ya ADPI ya Nchini Ufaransa  Mhandisi Guillaume Verna akifafanua hatua zilizochukuliwa katika utaalamu utaotumika katika ujenzi wa mikonga kwenye jengo hilo  jipya la abiria.
Picha na Hassan Issa  OMPR – ZNZ.

Eneo litakalotumika kwa huduma mbali mbali ikiwemo maduka na katika jengo jipya la abiria linaloendelea kujengwa katika uwanja wa ndege wa Kimataifa wa Zanzibar.  Picha na Hassan Issa  OMPR – ZNZ.

Eneo la Nje ya jengo la  Abiria litakalotumiwa na abiria wanaosafiri na kuingia Nchini kwa kutumia uwanja wa ndege wa Kimataifa wa Abeid Amani Karume uliopo Kiembe Samaki Nje kidogo ya Mji wa Zanzibar. Picha na Hassan Issa  OMPR – ZNZ.

  Press Release:-

Harakati za ujenzi wa Jengo jipya la Abiria wa usafiri wa Anga katika uwanja wa ndege wa Kimataifa wa   Abeid Amani Karume  ulipo Kiembe Samaki Nje kidogo ya Mji wa Zanzibar  zimekuwa zikiendelea kama kawaida kufuatia marekebisho ya ujenzi wa jengo hilo  utaozingatia kiwango cha Kimataifa.

Makamu wa Pili wa Rais wa Zanzibar Balozi Seif Ali Iddi alipata fursa ya kukagua harakati za ujenzi huo unaofanywa na wahandisi wa  Kampuni ya Kimataifa ya Beijing Construction Engineering  Group { GCEG } ya Nchini Jamuhuri ya Watu wa China Chini ya Usimamizi uelekezi wa Kampuni ya ADPI ya Nchini Ufaransa.

Msimamizi wa ujenzi wa Mradi huo kwa  upande wa Serikali ya Mapinduzi ya Zanzibar kupitia Wizara ya Miundombinu na Mawasiliano Zanzibar Nd. Yassir De Costa alimueleza Balozi Seif kwamba ujenzi huo hivi sasa uko katika hatua za uwezekaji paa na baadaye kuwekwa vioo.

Nd. Costa alisema Jengo hilo kubwa litakuwa  na lango kuu kwa ajili ya abiria wote wa ndege za kimataifa na Kitaifa ambapo baadaye watajigawa kwa mujibu wa safari za abiria hao katika huduma za ndani.

Alieleza kwamba mizigo ya abiria itafanyiwa ukaguzi mbara mbili kabla ya kuingizwa ndani ya ndege utaratibu ambao utathibitisha usalama wa abiria, mizigo na eneo lote la uwanja wa ndege.

Msimamizi huyo wa mradi wa ujenzi wa Jengo la abiria wa Serikali alifahamisha kwamba abiria wapatao 500 watakuwa wakihudumiwa ndani ya saa moja katika eneo la jengo hilo la abiria.

Naye mshauri wa mradi wa ujenzi wa jengo la abiria { Terminal 11 } kutoka Kampuni ya ADPI ya Nchini Ufaransa  Mhandisi Guillaume Verna alisema kwamba ujenzi wa Mikonga itakayohudumia ndege kubwa katika jengo hilo imezingatiwa katika kiwango kikubwa.

Mhandisi Guillaume alisema utafiti wa kina umefanywa katika kuona mikonga itakayopjengwa haiathiri jengo hilo kwa mujibu wa vipimo vinavyokubalika Kimataifa.

Mapema Katibu Mkuu Wizara ya Maiundombinu na Mawasiliano Zanzibar Dr. Juma Malik Akio alisema Serikali ya Jamuhuri ya China ambayo ndio mfadhili wa Ujenzi huo Kupitia Benki ya Exim imeridhia kuendelea kutekelezwa kwa mradi huo.

Dr. Malik alisema Wizara ya Miundombinu na Mawasliano kwa kushirikiana na wadau wa Mradi huo wanaandaa utaratibu wa kumaliza ujenzi huo kwa mujibu wa ushauri wa Kitaalamu.

Alisema  mategemeo ya mradi wa ujenzi huo yalipangwa kukamilika mwezi Oktoba mwaka huu lakini kutokana na kusita kwa muda ujenzi huo unatazamiwa kukamilika si zaidi ya mwishoni mwa mwaka huu.

Alieleza kwamba  mategemeo ya mradi wa ujenzi wa jengo hilo yalipangwa kukamikia mwezi oktoba mwaka huu lakini kutokana na kusita kwa muda ujenzi huo unatazamiwa kukamilika si zaidi ya mwishoni mwa mwaka huu.

Akitoa shukrani zake Makamu wa Pili wa Rais wa Zanzibar Balozi Seif alielezea faraja yake kutokana na kuendelea kwa  ujenzi wa jengo hilo  ambao uko katika hatua inayoridhisha.

Balozi Seif aliwapongeza wahandisi wa ujenzi huo pamoja na usimamizi mahiri wa mshauri muelekezi wa mradi huo hatua ambayo kumalizika kwake kutatoa faraja kwa abiria wanaotumia uwanja wa ndege wa Zanzibar.

Balozi Seif alifahamisha kwamba matarajio ya abiria wanaotumia uwanja huo wataondokana na  usumbufu wa kushuka au kufuata ndege masafa marefu kwa miguu hasa wakati wa mvua.

 

Read More

Makamu wa Pili wa Rais wa Zanzibar Balozi Seif Ali Iddi akieleza wakati alipofanya ziara fupi ya kukagua Nyumba zilizoathirika na Mvua Kubwa

 Makamu wa Pili wa Rais wa Zanzibar Balozi Seif akifanya ziara ya kukagua Nyumba zilizoathirika na Mvua Mkubwa ya Hivi Karibuni ambazo zimeanguka baadhi ya Kuta zake. Picha na Hassan Issa  OPMR – ZNZ

Mwenyekiti wa CCM Mkoa wa Kaskazini Unguja Haji Juma Haji aliyevaa shati ya Drafti na Kofia kati kati akimfahamisha Balozi Seif Kulia yake kadhia iliyowapata baadhi ya wananachi waliangukiwa na kuta za nyumba zao ndani ya Mkoa huo. Picha na Hassan Issa  OPMR – ZNZ.

Balozi Seif akimkabidhi Saruji, Matofali na Mchanga Bwana Khamis Haji Machano ikiwa ni mchango utakaomsaidia kuanza matengenezo mengine ya nyumba yake. Picha na Hassan Issa  OPMR – ZNZ.

Balozi Seif akimfariji na kumpa Pole Mzee Tanzilu Waziri Muharizo wa Kijiji cha Pitanazako Geuni Kikombe Tele baada ya ukuta wa Nyumba yake kubomoka kutokana na Mvua kubwa za hivi karibuni.  Picha na Hassan Issa  OPMR – ZNZ.

Makamu wa Pili wa Rais wa Zanzibar Balozi Seif akimkabidhi mchango wa Fedha Taslim Bibi Tatu Simai Ali wa Kijiji cha Upenja baada ya kuta za nyumba yake kubomoka kufuatia Mvua kubwa za Masika. Picha na Hassan Issa  OPMR – ZNZ

Mbunge wa Jimbo la Kitope Balozi Seif Ali Iddi akikabidhi Mchango wa shilingi Milioni 1,000,000/- Taslim zilizotolewa na Waziri wa Nchi Ofisi ya Rais Kazi na Utumishi wa Umma Mh. Haroun Ali Suleiman kutekeleza ahadi aliyoitoa kwa Kikundi cha Ushirika cha Saccos cha Kijiji cha Upenja. Picha na Hassan Issa  OPMR – ZNZ

Baadhi ya Wanachama wa Saccos ya Kijiji cha Upenja wakisikiliza nasaha za Mbunge wa Jimbo la Kitope Balozi Seif hayupo pichani wakati akikabidhi ahadi ya fedha zilizotolewa na Waziri Haruon Ali Suleiman. Picha na Hassan Issa  OPMR – ZNZ.

 Press Release:-

Serikali ya Mapinduzi ya Zanzibar itaendelea kushirikiana na Wananchi wake katika kuona changamoto na matatizo yanayowakumba Wananchi hao ikiwemo majanga na Maafa  yanapatiwa ufumbuzi wa uhakika kadri hali ya uwezeshaji itakavyoruhusu.

Makamu wa Pili wa Rais wa Zanzibar Balozi Seif  Ali Iddi alieleza hayo wakati alipofanya ziara fupi ya kukagua Nyumba zilizopata athari kutokana na kuanguka kwa baadhi ya kuta zake kufuatia Mvua kubwa za Masika zilizonyesha hivi karibuni.

Balozi Seif Ali Iddi akifuatana na Uongozi wa Serikali pamoja na wa  Chama cha Mapinduzi Mkoa wa Kaskazini Unguja alikabidhi mchango wa Matofali, Saruji, Mchanga na fedha taslimu ikiwa ni hatua ya kutoa mkono wa pole kwa Wananchi waliopatwa na maafa ya kubomokewa kwa Nyumba zao.

Akikabidhi michango hiyo kwa Bwana Khamis Haji Machano wa Kijiji cha Pitanazao Kizimbani,Bwana Tanzilu Waziri muharizo wa Kijiji cha Pitanazako Geuni Kikombe Tele, Bibi Tatu Faki Ali wa Pita nazako pamoja na Bibi Tatu Simai Ali wa Kijiji cha Upenja Balozi Seif alisema Serikali imeshtushwa na Mtihani uliowapata wananchi wake hao.

Alisema kwa vile mtihani huo ni kazi ya Muungu Wananchi hao wanapaswa kujitahidi kufanya matengenezo au kujenga tena nyumba zao kwa lengo la kupata hifadhi na kuendelea na maisha yao ya kawaida.

Balozi Seif aliwashauri Wananchi hao kuanza na hatua za awali za marekebisho hayo kutokana na kianzio cha msaada huo ukijumuishwa na ule uliotolewa na Mke wa Rais wa Zanzibar Mama Mwanamwema Sheni, Mke wa Makamu wa Pili wa Rais wa Zanzibar Mama Asha Suleiman Iddi kwa kushirikiana na Mfanyabiashara maarufu ambae pia ni Mwakilishi wa Jimbo la Uzini Mh. Moh’d Raza.

Wakati huo huo Makamu wa Pili wa Rais wa Zanzibar Balozi Seif mbae pia ni Mbunge wa Jimbo la Kitope alikabidhi mchango wa Shilingi Milioni Moja taslim                 { 1,000,000/- } zilizotolewa na Waziri wa Nchi Ofisi ya Rais Kazi na Utumishi wa Umma  Mh. Haroun Ali Suleiman kutekeleza ahadi aliyoitoa kwa Kikundi cha Ushirika cha Saccos cha Kijiji cha Upenja wakati alipokuwa Waziri wa Uwezeshaji Wananchi.

Balozi Seif na yeye akiwaahidi Wanachama wa Saccos hiyo ya Upenja kuwapatia  mchango wa Shilingi Laki 500,000/- kuendeleza Ushirika wao aliwapongeza wana saccos hao kwa  umahiri wao wa kuendelea kuilea Saccos hiyo.

Alifahamisha kwamba umahiri huo umewezesha kuzishinda changamoto mbali mbali walizokumbana nazo jambo ambalo limekwenda sambamba na Ilani na sera ya Chama cha Mapinduzi ya Kuimarisha Vikundi vya Ushirika nchini ambavyo ni mkombozi kwa Wananchi walio wengi hasa Vijijini.

Aliwataka wajitahidi zaidi katika kuimarisha miradi yao ya kilimo cha mboga mboga pamoja na biashara ya kukopesha huku wakihakikisha kwamba mwanachama anayepoka analipa kwa wakati.

Balozi Seif alitahadharisha kwamba Vikundi vingi vya Ushirika hapa nchini vilianzishwa kwa mitaji mikubwa lakini vimeshindwa kuendelea ndani ya kipindi kifupi kutokana na ukosefu wa uwazi na uaminifu.

Mapema Katibu wa Ushirika wa Saccos wa Kijiji cha Upenja Bwana Khamis Mussa Kwaza alisema Saccos yao imeanzishwa mwaka 2007 ikiwa na wanachama 33 wa Kike na Kiume.

Bwana Khamis Mussa alisema Ushirika wao unaendeshwa kupitia mradi wa Kibiashara kwa kutumia hisa pamoja na kilimo cha mboga mboga mambo ambayo yamewapatia mafanikio makubwa tokea kubuniwa kwa saccos hiyo karibu miaka Minane iliyopita.

Naye Mkuu wa Mkoa wa Kaskazini Unguja Meja Mstaafu Juma Kassim Tindwa aliwatanabahisha wananchi wa Mkoa huo kuwaangalia Viongozi wenye nia thabiti ya kutaka kuwahudumia kikweli.

Meja Mstaafu Tindwa aliwakumbusha wananchi hao kwamba Kiongozi mkweli ni yule mwenye kukubali kubeba dhima ya kutaka kusaidia miradi ya wananchi pamoja na kutafuta mbinu za kuwaondoshea changamoto zinazowakabili katika harakati zao za kujitafutia maendeleo kwa ustawi wa familia zao.

Read More

Makamu wa Pili wa Rais wa Zanzibar Balozi Seif Ali Iddi akisema yapo matumaini makubwa ya kukua kwa Uchumi wa Zanzibar kukua ambako kutategemea pia Uchaguzi Mkuu wa Mwezi wa Oktoba mwaka huu kama utakwenda kwa amani na utulivu.

Makamu wa Pili wa Rais wa Zanzibar Balozi Seif Ali Iddi akiifunga Semina ya Simu Nne  ya Wajumbe wa Bawaza la Wawakilishi pamoja na watendaji Wakuu wa Serikali juu ya uchambuzi wa Bajeti na Masuala ya Uchumi iliyokuwa ikifanyika katika ukumbi wa Z. Ocean Hoteli Chuwini Wilaya ya Magharibi “A”.  Picha na Issa Hassan  - OMPR – ZNZ.

Baadhi ya Wajumbne wa Baraza la Wawakilishi wakifuatilia Hotub a ya Balozi Seif hayupo pichani wakati akiifunga semina ya uchamguzi wa Bajeti na masuala yua Uchumi. Picha na Issa Hassan  - OMPR – ZNZ

Waziri wa Fedha ZanzibarMh. Omar Yussuf kulia na Waziri wa Biashara, Viwanda na Masoko Mh. Nassor Ahmed Mazrui wakiwa makini kufutailia Hotuba ya Balozi Seif kwenye Semina yao. Picha na Issa Hassan  - OMPR – ZNZ

Baadhi ya Watendaji Wakuu wa Serikali ambao wameshiriki Semina ya uchambuzi wa Bajeti na masuala ya Uchumi hapo Z. Ocean Hoteli Chuwini Wilaya ya Magharibi “ A “. Picha na Issa Hassan  - OMPR – ZNZ

Spika wa Baraza la Wawakilishi Zanzibar Mh. Pandu Ameir Kificho Kulia na Waziri wa Nchi Ikulu na Utawala Bora Dr. Mwinyihaji Makame wakikamilisha Semina hayo ya uchambuzi wa Bajeti na masuala ya Uchumi. Picha na Issa Hassan  - OMPR – ZNZ.

 Press Release:-

Makamu wa Pili wa Rais wa Zanzibar Balozi Seif Ali Iddi alisema  yapo matumaini makubwa ya kukua kwa Uchumi wa Zanzibar  kukua ambako kutategemea pia Uchaguzi Mkuu wa Mwezi wa Oktoba mwaka huu kama utakwenda kwa amani na utulivu.

Alisema Serikali kwa upande wake itahakikisha Tume ya Uchaguzi Zanzibar inaendesha Uchaguzi wenye uwazi, huru na haki kwa wagombea wote watakaobahatika kushiriki kwenye uchaguzi huo.

Balozi Seif Ali Iddi akiwa kiongozi wa shughuli za Serikali alisema hayo wakati akiifunga Semina ya siku Nne ya Wajumbe wa Bawaza la Wawakilishi pamoja na watendaji Wakuu wa Serikali juu ya uchambuzi wa Bajeti na Masuala ya Uchumi iliyokuwa ikifanyika katika ukumbi wa Z Ocean Hoteli Chuwini Wilaya ya Magharibi “A”.

Alisema Uchaguzi ulio salama na haki utakuwa kichocheo kikubwa   kitakachotoa fursa ya kusaidia kukua kwa uchumi wa Taifa sambamba na kuhamasiha wawekezaji wengi zaidi kumiminika nchini kwa lengo la kuwekeza miradi yao ya Kiuchumi.

Balozi Seif aliwanasihi wanasiasa ni vyema wakajiepusha na kauli za kuchochea vurugu, huku akiwataka wananchi kutokubali kuchochewa kuanzisha fujo wakati Waandishi wa Habari wakawajibika ipasavyo kutekeleza majukumu yao kwa jamii katika misingi ya uadilifu.

“Sifikiri kabisa kwamba kutakuwepo  au kuja kwa muwekezaji kutaka kuanzisha miradi ya kiuchumi wakati atashuhudia  pamoja na kuona utulivu wa amani unakosekana  kutokana na fitna na baadhi ya watu “. Alisema Balozi Seif.

Akizungumzia umuhimu wa kutunza Mazingira  Makamu wa Pili wa Rais wa Zanzibar alitahadharisha kwamba Jamii ikiendelea kuchafua mazingira ielewe kwamba Mvua zitapungua na hatimae kuathiri  Sekta ya kilimo kwa kiasi kikubwa.

Alifahamisha kwamba utunzaji wa mazingira kwa kila Taasisi au Mtu ni jambo la lazima kutokana na Wananchi walio wengi Zanzibar wanbategemea Kilimo katika kuendesha maisha yao.

Balozi Seif alieleza kuwa Serikali ya Mapinduzi ya Zanzibar kwa kushirikiana na Taasisi  tofauti wakiwemo washirika wa Maendeleo itaendelea kudhibiti uchafuzi wa mazingira kwa kasi zaidi ikiwemo kutunza vianzio vya Maji.

Kuhusu Bajeti inayozingatia matokeo { PBB } ambao ni mfumo mpya utakaotumika katika majadiliano ya Baraza la Wawakilishi kwenye Bajeti ya mwaka huu Balozi Seif alisema mfumo huu utawasaidia Wananchi kuelewa kwa uwazi Bajeti ya Serikali yao na imeleta matokeo gani kwao.

Alisema Mfumo huu mpya ambao utawapa Wajumbe wa Baraza la Wawakilishi kuendelea kujifunza unasaidia kujenga uwazi katika suala zima la matumizi ya Serikali jambo ambalo ni muhimu katika jitihada za kukuza uchumi wa Wananchi.

Makamu wa Pili wa Rais wa Zanzibar aliotoa wito kwa Wizara ya Fedha kuendeleza jitihada zake za kuelimisha watendaji  wa Taasisi za Serikali ili Mpango wa Bajeti inayozingatia matokeo { PBB } ufahamike vizuri zaidi.

“Mpango wa Bajeti inayozingatia matokeo { PBB } itatusaidia kuelewa walengwa wa program ni nani, program itatoa huduma gani “. Alifafanua Mtendaji Mkuu huyo wa Shughuli za Serikali.

Mapema Mshauri wa Baraza la Wawakilishi Zanzibar Bwana Mussa alisema mfumo mpya wa Bajeti { Bajet Office } tayari umeshaanzishwa na Mabunge mengi Ulimwenguni yakiwemo  pia baadhi ya Mabunge ya Afrika.

Bwana Mussa alisema Baraza la Wawakilishi Zanzibar limeanza na maandalizi ya kutumia  mfumo huu mpya tokea mwaka 2012 kwa hatua za awali ambao utekelezaji wake unaweka wazi matumizi ya Serikali.

Akiwasilisha majumuisho ya wanasemina Ndugu Hamad alisema Wajumbe wa Baraza la Wawakilishi pamoja na watendaji wakuu wa Serikali walipendekeza uwepo wa ubunifu katika uimarishaji wa vianzio vya mapato ya ndani.

Nd. Hamadi alisema mageuzi Katika uwajibikaji lazima uanzie kwa viongozi na baadaye  kuteremka kwa wananchi sambamba na changamoto mbali mbali zinazokwaza utekelezaji wa Mpango wa Kupunguza Umaskini Zanzibar { MKUZA }  ziondolewe.

Aidha alieleza kuwa washiriki wa Semina hiyo wakapendekeza pia kuwepo kwa Bajeti inayozingatia jinsia ijielekeze katika kutatua changamoto za Wanawake, Watoto pamoja na Makundi Mengine.

Semina hiyo ya siku Nne ya kujifunza Mpango wa Bajeti inayozingatia matokeo       { PBB } pamoja na mambo mengine  imejadili mada mbali mbali zikiwemo hali ya Uchumi, Idadi ya watu na Maendeleo, Uwazi na Uwajibikaji pamoja na Wajibu wa Baraza la Wawakilishi wa kusimamia Bajeti.

Read More

Makamu wa Pili wa Rais wa Zanzibar Balozi Seif Ali Iddi akiwa pia ni Mwenyekiti wa Kamati ya Taifa ya Sherehe na Maadhimisho ya Kitaifa alipata fursa ya kukagua matayarisho ya ujio wa Rais wa Jamuhuri ya Msumbiji Bwana Philipe Jacinto Nyusi

 Mjumbe wa Kamati ya Mapokezi ya Rais wa Msumbiji Maalim Vuai Khamis kutoka Taasisi ya Elimu akikagua Gwaride la Jeshi la Wananchi wa Tanzania {JWTZ } ikiwa ni maandalizi ya mwisho ya ujio wa Kiongozi huyo wa Jamhuri ya Msumbiji Bwana Philipe Jacinto Nyusi anayetarajiwa kufanya ziara ya siku Moja Zanzibar. Picha na Hassan Issa  OMPR – ZNZ.

Kamanda Mkuu wa Brigedia Nyuki Zanzibar Bwigedia Jenerali Cyrill Ivor Mhaiki akibadilishana mawazo na Makamu wa Pili wa Rais wa Zanzibar ambae pia ni Mwenyekiti wa Kamati ya Sherehe na Maadhimisho ya Kitaifa Zanzibar Balozi Seif Ali Iddi aliyefika uwanja wa Ndege wa Zanzibar kuangalia matayarisho  ya mwisho ya ujio wa Rais wa Msumbiji hapa Zanzibar. Picha na Hassan Issa  OMPR – ZNZ.

Balozi Seif akisisitiza jambo wakati alipokagua matayarisho ya mwisho ya Gwaride la kumpokea   Rais wa Msumbiji atakapowasili Zanzibar mapema wiki ijayo.
Kushoto ya Balozi Seif ni Mkurugenzi wa Idara ya Mambo ya Nje Zanzibar Balozi Silima Kombo, Mshauri wa Rais wa Zanzibar katika masuala ya Kiuchumi na Uhusiano wa Kimataifa Balozi Moh’d Ramia, Kamanda wa Brigedia Nyuki Zanzibar Brigedia Jenerali Cyrill Ivor Mhaiki na Mjumbe wa Kamati ya Sherehe na maadhimisho ya Kitaifa kutoka JWTZ Kanali Shaaban Lissu. Picha na Hassan Issa  OMPR – ZNZ.

Balozi Seif akikiendesha Kikao cha Kamati ya Mapokezi ya Ujio wa Rais wa Msumbiji Bwana Philipe Nyusi hapo katika jengo la watu mashuhuri     { VIP } Kongwe katika uwanja wa ndege wa Kimataifa wa Zanzibar. Picha na Hassan Issa  OMPR – ZNZ.

Bwa Philipe Jacinto akiwa katika harakati za kampeni wakati wa uchaguzi Mkuu wa Msumbiji ambapo aliinuka kidedea na kuliongoza Taifa hilo katika kipindi cha miaka mitano ijayo. Picha na Hassan Issa  OMPR – ZNZ.

Wanachama wa Chama cha Frelimo wakati wa Kampeni za Uchaguzi Nchini Msumbiji na hatimae chama hicho kufanikiwa kuongoza Dola. Picha na Hassan Issa  OMPR – ZNZ.

Press Release:-

Matayarisho kwa ajili ya ujio wa Rais wa Jamuhuri ya Msumbiji Bwana Philipe Jacinto Nyusi anayefanya ziara rasmi ya Kiserikali Nchini Tanzania yamekamilika kwa  upande wa hapa Zanzibar.

Bw. Nyusi anaiongoza  Jamuhuri ya Msumbiji katika kipindi cha Miaka Mitano baada ya kuingia Madarakani  kwenye Uchaguzi Mkuu wa Nchi hiyo wa Tarehe 15 Oktoba mwaka 2014 Kupitia chama Tawala cha Frelimo.

Makamu wa Pili wa Rais wa Zanzibar Balozi Seif Ali Iddi akiwa pia ni Mwenyekiti wa Kamati ya Taifa ya  Sherehe na Maadhimisho  ya Kitaifa alipata fursa ya kukagua matayarisho hayo yaliyoandaliwa na Jeshi la Wananchi wa Tanzania { JWTZ } pamoja na vikundi vya burdani.

Matayarisho ya mapokezi hayo yamefanyika katika Uwanja wa Ndege wa Kimataifa wa Abeid Amaan Karume ambapo Nyimbo za Taifa za Msumbiji na   wa Zanzibar ziliiimbwa zikiambatana na mizinga 21 ya majaribio kupigwa kuashiria kukamilika kwa maandalizi hayo.

Bwana Philipe Nyusi anayetarajiwa kupokelewa rasmi na mwenyeji wake Rais wa Zanzibar na Mwenyekiti wa Braza la Mapinduzi Dr. Ali Mohammed Shein mchana wa Jumatatu ya Tarehe 18 Mei mwaka huu atapata fursa ya kupokea saluti na kukagua gwaride rasmi lililotayarishwa kwa heshima yake.

Katika mapokezi hayo Dr. Shein anatarajiwa pia kuambatana na Viongozi mbali mbali wa Serikali, Kisiasa, wananchi pamoja na Raia wa Msumbiji wanaoishi hapa Zanzibar .

Bwana Philipe Jacinto Nyusi aliyezaliwa  Tarehe 9 Febuari mwaka 1959  katika Kijiji cha Namai kwenye Jimbo la Cabo Delgado ndani ya Wilaya ya Mueda Nchini Msumbiji akitokea katika familia ya wazazi waliopigania uhuru wa Taifa hilo kutoka kwa Wareno ana stashahada ya Uhandisi ya chuo Kikuu cha Manchester Nchini Uingereza .

Kiongozi huyo wa Msumbiji Bwana Nyusi kabla ya kuwa Waziri wa Ulinzi wa Msumbiji kuanzia Tarehe 27 Machi mwaka 2008 hadi 2014 aliwahi pia kuwa Mhadhiri katika Kampus ya  Nampula ya chuo Kikuu cha Pedagogica.

Kiongozi huyo wa Jamuhuri ya Msumbiji Bwana Philipe  Jacinto Nyusi anakamata wadhifa huo akiwa Rais wa Nne Tokea Taifa hilo kutoka mikononi mwa Ureno akitanguliwa na Kiongozi wa kwanza wa Ukombozi Rais  Samora Machel, Bw. Joaquim Chisano pamoja na Bwana Armando Guebuza.

Bwana Nyusi  mwenye umri wa miaka 56  akiwa ni Rais wa 4 kuchaguliwa Kidemokrasi Nchini Msumbiji wazazi wake walimvusha kupitia Mto Ruvuma na kuingia Nchini Tanzania kupata elimu yake ya awali katika  Skuli ya Msingi ya Frelimo Tunduru Nchini Tanzania.

Alifanikiwa kuendelea na masomo yake ya Sekondari kwa kujiunga na Skuli ya Frelimo ya Mariri iliyopo Cabo Delgado na baadaye Sekondari ya Samora Mashel Mjini Beira.

Mwaka 1973 Bwana Philipe Nyusi aijiunga na Chama cha Frelimo akiwa na umri wa Miaka 14 na kujiingiza katika masuala ya kisiasa na baadaye kupata mafunzo ya kijeshi  katika Kambi ya mafunzo ya Nachingwea Nchini Tanzania.

Akiwa Mjumbe wa Kamati Kuu ya Taifa ya Ukombozi wa Frelimo Bwana Philipe Nyusi alipata mafunzo ya Uongozi katika Mataifa ya India, Afrika Kusini, Swaziland na Marekani.

Mwaka 1990 Bwana Philipe Nyusi alikamilisha mafunzo yake  ya Shahada ya kwanza ya Uhandisi  katika chuo kikuu cha Ufundi cha Brno iliyokuwa Czechoslovakia. Pia alipara stashahada ya Uongozi katika Chuo Kikuu cha  Manchester Nchini Uingereza.

Kwenye Utumishi wa Umma Bwana Nyusi aliwahi kufanya kazi katika Mamlaka ya Bandari na Reli ambapo utendaji wake ulimuwezesha kuchaguliwa kuwa Mkurugenzi  Mkuu wa Mamlaka hiyo baadaye kuchaguliwa kuwa Mjumbe wa Bodi ya Mamlaka hiyo.

Mnamo Tarehe 1 Machi 2014 Kamati Kuu ya Taifa ya Chama cha Frelimo ilimchaguwa Bwana Philipe Nyusi kuwa mgombea wa chama hicho katika Uchaguzi Mkuu wa Nchi hiyo baada ya kupata asilimia 68% ya kura dhidi ya mgombea mwenzake wa chama hicho Bibi Luisa Diogo aliyepata asilimia 31%.

Hiyo ilikuwa raundi ya pili ya kumtafuta Kinara wa Frelimo atakayeipeperusha Bendera ya Chama hicho kwenye   uchaguzi Mkuu wa Vyama vingi Nchini Msumbiji wa 2014 baada ya ile ya kwanza  aliyopata asilimia 46% chini ya kiwango kinachokubalika kwa mujibu wa Katiba ya Nchi hiyo cha asilimia 50%.

Bwana Philipe  Jacinto Nyusi alifanikiwa kueperusha Bendera ya Chama cha Frelimo baada ya kushinda Uchaguzi Mkuu wa Tarehe 15 Oktoba mwaka  2014 kwa kupata Kura Milioni 2,778,497 sawa na asilimia 57.03%.

Aliwashinda Wapinzani wake Bwana Afonso Dhlakama wa Chama che Renamo aliyepata kura Milioni 1,783,382  sawa na asilimia 36.61% akishika msindi wa  Pili na Bwana Dayiz Simango wa Chama cha MDM aliyepata Kura Laki 309,925 sawa na asilimia 6.36%.

Kiongozi huyo wa Jamuhuri ya Msumbiji Bwana Philipe  Jacinto Nyusi anakamata wadhifa huo akiwa Rais wa Nne Tokea Taifa hilo kutoka mikononi mwa Ureno akitanguliwa na Kiongozi wa kwanza wa Ukombozi Rais  Samora Machel, Bw. Joaquim Chisano pamoja na Bwana Armando Guebuza.

Read More

Mwakilishi wa Mkutano Mkuu wa Chama cha Msalaba Mwekundu Tanzania { RED CROSS } Bwana Shaaban Ali Iddi akikabidhi msaada wa Viatu Pair 90 kwa Katibu wa Kamati ya Taifa ya Kukabiliana na Maafa Zanzibar Dr. Khalid Salum Moh’d

Mwakilishi wa Mkutano Mkuu wa Chama cha Msalaba Mwekundu Tanzania { RED CROSS } Bwana Shaaban Ali Iddi akikabidhi msaada wa Viatu Pair 90 kwa Katibu wa Kamati ya Taifa ya Kukabiliana na Maafa Zanzibar Dr. Khalid Salum Moh’d kwa ajili ya watoto wa familia zilizopata maafa ambao wapo Kambini  Skuli ya mwanakwerekwe “C” .

Katibu wa Kamati ya Taifa ya Kukabiliana na Maafa Zanzibar Dr. Khalid Salum Moh’d akiushukuru Uongozi wa Red Cross kwa misaada yao ya Kibinaadamu waliyotoa kwa ajili ya familia zilizopatwa na maafa wiki iliyopita. Wanaoshuhuria kutoka kushoto ni  Makamu Mwenyekiti wa Red Cross Tanzania Bwana Salum Juma na Mjumbe wa Red Cross Mkoa Mjini Magharibi Bwana Mwinyi Khamis Hamad.

Uongozi wa Chama cha Msalaba mwekundu Tanzania ukimsikiliza Katibu wa Kamati ya Taifa ya Kukabiliana na Maafa Zanzibar Dr. Khalid Salum Moh’d hayupo pichani akitoa nasaha zake baada ya kupokea msaada uliotolewa na Uongozi huo. Kutoka Kulia ni Mwakilishi wa Mkutano Mkuu wa Chama cha Msalaba Mwekundu Tanzania { RED CROSS } Bwana Shaaban Ali Iddi, Mjumbe wa Red Cross Mkoa Mjini Magharibi Bwana Mwinyi Khamis Hamad na Makamu Mwenyekiti wa Red Cross Tanzania Bwana Salum Juma.

Picha Hassan Issa–OMPR – ZNZ.

Press Release:-

Chama cha Msalaba mwekundu Tanzania { red Cross } kimekabidhi msaada wa viatu Pair 90 kwa ajili  ya watoto wa familia zilizowekwa Kambini  katika Skuli ya Sekondari ya Mwanakwerekwe “C” baada ya Nyumba zao kujaa maji ya mvua.

Msaada huo umefuatia Mvua za Masika zilizotokea usiku wa kuamkia Tarehe 3 Mei mwaka huu na kuleta maafa makubwa yaliyosababisha zaidi ya  Nyumba 700 kuathirika  ndani ya Mkoa wa Mjini Magharibi na kuzikosesha makaazi Familia zilizokuwa zikiishi katika nyumba hizo.

Ujumbe  wa Red Cross Mkoa wa Mjini Magharibi ukiongozwa na Mwakilishi wa Mkutano Mkuu wa Chama hicho Bwana Shaaban Ali Iddi umekabidhiwa msaada huo kwa Katibu wa Kamati ya Taifa ya Kukabiliana na Maafa Zanzibar  ambae pia ni Katibu Mkuu Ofisi ya Makamu wa Pili wa Rais wa Zanzibar Dr. Khalid Salim Moh’d hapo Ofisini kwake Vuga Mjini Zanzibar.

Akizungumza katika hafla hiyo fupi Bwana Shaaban Ali Iddi alisema Uongozi wa Red Cross ulifikia hatua ya kutoa msaada huo baada ya kugundua kwamba  idadi kubwa ya watu waliohifadhiwa kwenye kambi ya dharura ya Mwanakwerekwe “C” ni Watoto wadogo.

Alisema Red Cross imeguswa na tukio hilo la mafuriko hivyo licha ya juhudi wanazochukuwa za kutoa misaada mbali mbali ya huduma lakini pia ikawajibika kuongeza msaada huo wa Viatu ambao kwa kiasi kikubwa utawasaidia watoto hao.

Mwakilishi huyo wa Mkutano Mkuu wa Red Cross Taifa aliyaomba Mashirika na Taasisi nyengine za Kitaifa na Kimataifa kuendelea kuguswa na Tukio hilo na kutoa misaada kwa jukumu hilo si vyema ikaachiwa pekee Serikali Kuu.

Akipokea Msaada huo  Katibu wa Kamatio ya Taifa ya Kukabiliana na Maafa Zanzibar ambae pia ni Katibu Mkuu Ofisi ya Makamu wa Pili wa Rsis wa Zanzibar Dr. Khalid Salum Moh’d aliipongeza Red Cross kwa jitihada zake inazoendelea kuchukuwa katika kusaidia huduma za Kijamii.

Dr. Khalid alisema Viongozi na Wanachama wa Chama cha Msalaba Mwekundu Tanzania muda wote wamekuwa karibu na Serikali hasa wakati yanapotokea matukio ya majanga na maafa.

Katibu huyo wa Kamati ya Taifa ya kukabiliana na Maafa Zanzibar aliupongeza Uongozi wa Red Cross kwa hatua yake hiyo ambayo itasaidia kupunguza machungu ya Watoto hao, wengi kati yao wamepoteza vitu vyao vyote zikiwemo nguo na hata madaftari ya Skuli.

Alisema Kambi ya dharura ya Mwanakwerekwe “ C “ hivi sasa ina zaidi ya watoto 74 walio chini ya umri wa miaka 14  wanaoendelea kuhifadhiwa ambao watafaidika na msaada huo wa viatu.

“ Asilimia kubwa ya Watoto hao waliopo Kambini wamepoteza Vitu vingi ikiwemo Madaftari ya Skuli, Nguo, Viatu na vitu vyengine muhimu wanavyotumia ambavyo vingi kati yao tayari Idara ya Maafa kupitia Taasisi na Mshirika hisani wameshapatiwa “. Alifafanua Da. Khalid Salum Moh’d.

Pia  aliyashukuru na kuyapongeza Mashirika na Taasisi za Umma na hata zile Binafsi zilizojitolea kutoa misaada mbali mbali ya Kibinaadamu na kuziomba zisichoke kwa vile bado mahitaji zaidi kwa waathirika hao yanahitajika.

Katibu huyo wa Kamati ya Taifa ya Kukabiliana na Maafa Zanzibar alieleza kwamba Serikali imeandaa mpango maalum wa  usafiri kwa watoto wote waliopo Kwenye Kambi ya dharura Mwanakwerekwe “C” kuendelea na masomo yao kwenye skuli mbali mbali wanazotoka.

Dr. Khalid aliwatoa hofu Wazazi wa Watoto hao kwamba Gari zilizoandaliwa zimepangwa kuwachukuwa  watoto hao na kuwapeleka kwenye Skuli zao waanze masomo kama kawaida na kuwarejesha Kambini  baada ya kumaliza masomo yao kwa kila kipindi watachokuwapo kambini hapo..

Read More